یارین بویون قوجاخلادیم یارآغلادی من آغلادیم
ییغشدی قونشولار بوتون جار آغلادی من آغلادیم
باشیندا قارلی داغلارا دانشدیم آیرلیق سوزون
بیر آه چکیب باشینداکی قار آغلادی من آغلادیم
طاریمدا نار آغاجلاری منی گوروب دانیشدیلار
بویومو زیتون اوشاخدی نار آغلادی من آغلادیم
ایله که اسدی بیر خزان تالاندی گوللیرم منیم
خبر چاتینجا بولبوله خار آغلادی من آغلادیم
اورک سوزون دئدیم تارا سیملر اولدی پارا پارا
یاواش یاواش سیزیلدادی تا آغلادی من آغلادیم
دئدیم کی حق منیم کی دیر باشیمی چکدیلر دارا
طنف سیخاندا بوینومو دار آغلادی من آغلادیم
جعفری یم بویوم بالا غم اورکده قالا قالا
یار جانمی آلا آلا یار آغلادی من آغلادیم
استاد هوشنگ جعفری
+0 به یه ن
اوچور ایلهامیم او قوشلار كیمی كی
یاز وعده سینده
قووزانیر ماوی گؤیه تا اوجا باش بیر داغا قونسون
كؤرپه قارتال كیمی دیر
گاه چكیلیر گوزده ن ایتینجه ك
اگ له نیر گاه ساوالان عشقینه – آغدان – آغا قونسون
هر اوجا داغ كی گؤرورسن باشی قاردلا آغاراندی
اورا بیل كی ساوالاندی
آمما یوخ !
هر اوجا داغ سسیمی السا دا تئز قئیته ره جكدی
سسی قئیته رمك همان یئل بیله جكدی
آخی یئل یولچودو گئتگین اوكی سؤز ساخلایا بیلمز
یئل سؤزو قاپدی قاچیردار اونو كیم هاخلایابیلمز
یئل گئدرگیندی پیچیللارسؤزوكوللار قولاغیندا
سؤزو قربان ائله یر قیرنادا قانقال آیاغیندا
چئویره ر سؤز چاناغیندا
جالایارداغلارا هر بیر سؤزو مین سؤز تؤره دندی
بیلمیرم سیرری ندندی
یئل گئده ر گیندی یئلی ساخلاماق اولماز
یئله بئل باغلاماق اولماز
آمما سن ای سؤزو سینه نده كؤزردن ساوالانیم
كیم گله صدقله زرتشت بئجردن ساوالانیم
ائلیمین شانلی داغی باشیوه مین لرجه دولانیم
اریدیب ائل غمی بیر یول سنی كؤكدن ده تالانسان
سئل اولوب قانلی دنیز لر كیمی دونیایه جالانسان
آدی دیللرده قالاناسان
ساوالانسان ، ساوالانسان
ساوالان ائل غمینی بللی دی ساخلار سینه سینده
سینه سی كؤزدو آلودور گیزیریك اینسی سی واردیر نفسینده
شاعرین غملی سه سینده آلگیلان ساخلاسن ای ائل داغی غملی قفسینده
ساوالان آلسادا هر سیرری سؤزو داغلارا سالماز
گؤره نامرد دوروبدور ساوالاندان سس اوجالماز
ساوالاندا تؤكولن داشلاری دیندیر دانیشاللار
سالسا عاشیق نفسین كوللارا آلیشاللار
ده ده قورقود سازی چالسا
دلی دومرول باش اوجالدار
بلی البته كی یولداش باشینی یولداش اوجالدار
سسله عاشیق سازی چالسین
سسی میز بیرده اوجالسین
اویناماق لیز گی یه دؤنسون
كاس شوشه م گوزگویه دؤنسون
قوی وئره ك سس سسه باهم اوخویاق بیر ده كوراوغلو دلی سیندن
هجرین قوچ نبی سیندن
اوكی ظالیملری مظلولارین اوستونده ازه ردی
او كی آسلان كیمی داغلاردا یاتیب باغدا گزه ردی
اوخو عاشق اوخو
سن بیل او كی تانری تانییبسان
سؤزومه دوز جالییبسان
سوموگوم قوی سازا گلسین
بولبولوم آوازا گلسین
یازمیشام ایوازا گلسین
گوچ آلاق قوی دلی لردن
باج آلاق اجنبی لردن
او كی بیلمیر نبی كیمدیر قویون آذر ائلینی مسخره سانسین
بیر عؤمور دوركی فضولی نی – نسیمی نی دانیب ایندی ده دانسین
شهریار تك سن اوجالت باشیوی قوی عرشه دایانسین
قوی باخار كور تر ایچینده جوموبان اؤلسون – اوتانسین
اوكی آخساخدی یوبانسین
اوكی توركون دیلین اسگیتمه گه تصویره سالیبدیر
اوكی توركون بالاسین ایندی ده آشغالچی سانیبدیر
او تفاله بیلیرم فیكیرینی طاغوتدان آ لیبدیر
او رژیمدندی قالیبدیر
یوخسا توركون بالاسیندا نچیخیب علامه ی دوران
اونا دونیا باش ا ییر فلسفه ده
بیر جه نه ایران
قوی دئییم شهریاریمدان
"نیسگیل او چرچی یه قالسین كی جواهر نه دی ، قانمیر"
فیكری آللاتما دادیر خالقی ،ائلین حالینه یانمیر
اریمیر ، اؤلمور ، اوتانمیر
آخی ای قاردا ، دوماندا باش اوجالدان ساوالانیم
غمی ، دونیا نی قوجالدان ساوالانیم
ائل بیلیر داغلار آرا هراوجا داغلار باشی سن سن
وئرسهنده الیوی قارداشیوین سیر داشی سن سن
وئر گیلن بیر لیك الین بیرده دماونده اونون یولداشی سن سن
اوندان آیریلما آماندی
یولوموز چندی دوماندی
قوی ایگیدلر سیزه فخر ائیله ییبن باشان اوجالتسین
قویما قارتال دولانان یئر لره قوز غون الی چاتسین
ساوالان چنلی چاغیندا
منیم ایلهامیم اولاركن
كؤنلوم اؤز سرری سؤزون صدق ایله سؤیلر ساوالانه
ساوالان كؤز قالادار شاعر اولانلار سینه سینده
اوردا زرتشت گئیب تانریدان ایلهامین آلانه
اگیرم باش ساوالانه ، اگیرم باش ساوالانه
+0 به یه ن
دیلیم یالقیز، دیلیم یالقیزدیر آی قیز
اوغول شیرین ولی قیز بالدیر آی قیز
آماندیر اوزاق دورما تورکون دیلیندن
اوکی اصلین دانار کال قیزدیر آی قیز
بیزیم تورکون دیلی گول دن ظریف دیر
بوتون دیللر دال اولسا بو الیف دیر
ادب ده علم ده هر بیر هونرده
سیز آللاه تورکلره کیم لر حریف دیر
وارلیقدا بوتون وار یوخوموز شعر و غزل دیر
هر بیر غزلی اللی آرا تورکه مثل دیر
من جعفری ام سؤز یازارام تورکو دیلینده
تورکون بالاسی تورک اولا عالمده گؤزل دیر
استاد هوشنگ جعفری
+0 به یه ن
باخدیم دالیسیجا یار گئدنده
بیر یولدا دئدیم باخار گئدنده
باخدی قاپیدان کئچنده گولدو
بیلمیردی اوره ک اومار گئدنده
باغلاندی دیلیم اوره کده ن آمما
آز قالدی چئکم هاوار گئدنده
گئتمه گئدیسن؟ یاواش – یاواش گئت
جانیم بیلی سن چیخار گئدنده
دؤندر گؤزونو خومار – خومار باخ
قویما منی ده، خومار گئدنده
سن سیزلیگه دوزمه گیم چتیندی
گل جانیمی آل قوتار گئدنده
سندن سورا عشقی نئیلیرم من
آل عشقینی ده آپار گئدنده
مئهر ائیله نوازش ائیله بلکه
گول بیتسین اورک ده قان گئدنده
من گؤر نه دئییردیم اؤز اؤزومنه ن
قول بوینوما بیر سالار گئدنده
بیچاره اوره ک بولود کیمین دیر
گؤردوکجه سنی دولار گئدنده
دای «جعفری» بسدی سیزلاما چوخ
سؤز اوستادی شهریار گئدنده
ایراندا هونر دیلنچی لیک دیر
باخما کی تاپار ویقار گئدنده
استاد هوشنگ جعفری
+0 به یه ن
فریاده گلین نازلی نیگاریم گیدیر الدن
همدم اولوب اغیاریله یاریم گئدیر الدن
رفتاری گوزه ل نطقی گوزه ل باخماسی گوئچک
آهو کیمی باخدیقجا قراریم گیدیر الدن
حسرتله قالارگوزلریم اخر دالیسیجا
هئجران یلی اسدیکجه باهاریم گئدیر الدن
ناز ائله سه نازین چکرم ائول دیسه اوللم
یوخ چاره یولوم شعرو شعاریم گئدیر الدن
آواره قالان من غم عشقینده یانان من
آخر نه دیئم دارو نداریم گئدیر الدن
زولفون توکوب اطرافه گئیب رخت عروسی
آماده اولوب گئتمگه یاریم گئدیر الدن
استاد هوشنگ جعفری
+0 به یه ن
آچین آققیشقالاری ، آچین آققیشقالاری
هاوالار تک اوره ییم دولغوندور
قورویان داغلارا یاغماق دیله ییر
سئل اولوب ظالیم ائوین ییخماغا
آخماق دیله ییر
ایلدیریم تک گئجه باغرین یارا
شاخماق دیله ییر
گونه باخماق دیله ییر
آچین آققیشقالاری
آچین آققیشقالاری
♥♥♥♥♥♥♥♥♥♥♥♥
منه یوخ
قفس غمده قناری لره بیر رحم ائلهیین
بیر گولون سولماسینا سولمامیشام
قلبیمین دولماسینا دولمامیشام
قورخورام توسکو چالا گولخانانی
آچین آققیشقالاری
آچین آققیشقالاری
♥♥♥♥♥♥♥♥♥♥♥♥
آچین آققیشقالاری
بیر گؤروم اؤلکه مه ماغا
بیرلشن ائل لر نئج اولوب
کوچه لرده یوموروق توسکورو
بایراق نئج اولوب
بیزیم ائل لر نئج اولوب
آچین آققیشقالاری
آچین آققیشقالاری
♥♥♥♥♥♥♥♥♥♥♥♥
آچین آققیشقالاری
بو نه یئردی کی ایشیق لیق یولو یوخدور
بیلمیرم قبله م هایاندیر
ائویمین ساغ سولو یوخدور
بیرینی بغض توتوبدور دانیشانمیر
بیری بیر شیردی دوشوب دار قفس ایچره چالیشانمیر
آنا ایستکلی بالاینان بارشانمیر
ایکی تورپاق قاریشانمیر
قول بویونلا ساریشانمیر
آچین آققیشقالاری
آچین آققیشقالاری
♥♥♥♥♥♥♥♥♥♥♥♥
بابا آچین آققیشقالاری
ائله بیل کی قولاغا وای سه سی گلدی
قاراباغدان اوغول ای وای سه سی گلدی
♥♥♥♥♥♥♥♥♥♥♥♥
آچین آققیشقالاری
آچین آققیشقالاری
ائله بیل کی قولاغا وای سه سی گلدی
آنالار قالمیش اوغول سوز
اوغول ای وای سه سی گلدی
دییه سن های سه سی گلدی
یا گورون قانلی بئشیک اوخشوری لای لای سه سی گلدی
♥♥♥♥♥♥♥♥♥♥♥♥
قاپی تاختا ، دالی سالقی ، باجا باغلی ، سه سیم آرقین
نه گئدیر سه س ، نه گلیر های
اولدو کال کلمه لر اوسته عملیم زای
آچین آققیشقالاری
آچین آققیشقالاری
استاد هوشنگ جعفری
+0 به یه ن