قویدو ویرانه زامان جبری اگر خانه میزی

عشق آباد ائده جک غم یئمه ویرانه میزی

چوخدا سالمیر یادینا بیزلری زر تئلی گونش

گینه دولدورمالی دیر شوقیله پیمانه میزی

ظلمتین دیوینه گوج گلمسه ده آی چراغی

جام می واردیر ایشیقلاندیرا میخانه میزی

سارالان صورتینی سعی ائله سیلی له قیزارد

ضعفیمیز بلکه سئویندر مییه بیگانه میزی

گل وئرک باغچادا بولبول الینی گول الینه

بزم عشّاقه چکه ک شمعیله پروانه میزی

گوزلـرون آخ نه گوزلدیـر ، نه گوزل ، آی پاراسی

اوزی بیر دونیا بویاغ دیرگوزوون آغ ـ قـاراسی

بو نـه گوزیاشدی کی طوفانلی ائدیب گوزلرووی

جـانیمـا دوشسـون اگر گوزلـروون وار قاداسی

دامجـی دامجـی ییقیلیـر خیردا گوزه ، من نه دئیم

دنـیـزه بـنـزیـیــر آمـا ایـکـی کیپـریـک آراسی

ائلـه اولـدوز کیمـی گوزیـاشی یئره توکمه گوزل

ائلـه اولـدوزلارا دیـمـز گونـشـیـن گوشواراسی

آغلامـا ، بیـر بئلـه گوزیـاش ائله مه ، آرخایین اول

قویمارام سئل لره دوشسون گئنه ده ائل ساراسی

بیر گوزل فارسی آذری اوخوما [بوردا باخ]

آی چیخدی هاله سین اوزه گورستی تازه دن
قالدیم اوز آی تک عشقیمه حیران غریب غریب

آسلاندی نوری زلفی پریشان نگاری تک
کونلوم داریخدی حسرت و نالان غریب غریب

گویدن دریبدی خوشۀ پروین گولون کیمه؟
گویا عروسه دسته گول الوان غریب غریب

آی سن بو عشقیله منی حیرانه قویموسان
روحوم اوچوب او گویلره طرلان غریب غریب

بیر اوچی تک اوز عشقیمی چکدیم شکاره من
یان دوشدی سینه دن قوزو جیران غریب غریب

ایندی قالیبدی سینه ده کونلوم تک آرزولی
آرزوم گله اورک کسه قوربان غریب غریب

آی جیرانیم نیه داغلاری حیران دولانیسان؟
گل سینه مه قوتارگینان هجران غریب غریب

پاییز سیزیلدییر یئنه اوز یارین آختاریر
هجرینده جان وئریر داها جانان غریب غریب

دونن آخشام چاغی سن سیز منی آغلاتدی یاغیش

یادیما سالدی سنی، مطلبینه چاتدی یاغیش

کوچه لر اؤلدو گوزومدن، یئنه بیر آرپاچایی...

منی سن سیز نئجه نیسگیل سئلی نه آتدی یاغیش

اؤدو سوندور مئیه سو  قایداسی دیر آمّا دونن

کؤزَه رَن  کونلومو  یاندیقجا  آلوولاتدی  یاغیش

دامجی دامجی سنه لای لای دئدی قوینومدا منیم

نه دئییم بلکه سنی کورپه یه اوخشاتدی یاغیش

یادیما سالدی یاغیش لیق گونو کی  اوندا منی

کپنک تک  باشینا  شوقیله اویناتدی  یاغیش

دوداقین قیرمیزی گوللر کیمی آچمیشدی سنین

سوزولن واقت او دوداقلاردا قانا باتدی یاغیش

دونن آخشام چاغی بیر سودادا گوردوم کی منه

آجیلیقلا او شیرین خاطیره نی ساتدی یاغیش

اویانیردیم کی باشیم دئیدی ملامت  داشینا

منی  رؤیادان  آیید ماقدا اؤزو یاتدی یاغیش

سن سیز اوره گیم ناره گرفتار اولو گئتمه
كئچمیش قارا گونل منه تكرار اولو گئتمه

مین دردیمه درمان گتیریب نرگس مستون
گئتسون دل سودا زده بیمار اولو گئتمه

اون دورت گئجه لیك آی كیمی ساچ كونلومه یوخسا
زلفون كیمی آیدین سحریم تار اولو گئتمه

كونلوم قوشی چیخمازدی چمن سیرینه سن سیز
سنلن گوزلیم مایل گلزار اولو گئتمه

عشاق آرا باشیم اوجالار داغ كیمی قالسون
اغیار آرا " عاصم " قوجالیب خوار اولو گئتمه

ای صوبح آچیل دوباره گؤروم نازلی یاریمی

حظ ائیلیرم گؤرنده من اول با ویقاریمی

بیلمم کی قارا گؤزلری نین وار نه حیکمتی

الدن آلیر توانیمی ، صبر و قراریمی

دوزدوم سه لایه تخته یه رنگ و قلملری

ترسیم ائدم اورک ده کی نقش و نیگاریمی

اوّل قارا گؤزون گتیرم تابلو اوستونه

زولفون چکنده یادا سالام روزگاریمی

آهو باخیشلی گؤزلرینین حالتین چکم

بیر یول تؤکم بوم اوستونه دار و نداریمی

طراح لیغیندا هر نه گوجوم وار نشان وئرم

مبهوت ائدم ایشیمده من اؤز اوستا کاریمی

مانی دوروب الیمدن اؤپوب آفرین دییه

صورت چکنلر ائیله یه تحسین چیخاریمی

کؤنلوم سئویر کی منبع ایلهامیم اولان منه

سندن توان آلیب یارادام شاهکاریمی

گر اؤلکه میزده بیلسه له من عاشیقم سنه

اؤلسم ، سنین قاپیندا قازارلار مزاریمی

جنتده خالیقیم دئسه بو حوریلر بو سن

گؤرسم قویوبلار اؤز الیمه ایختیاریمی

آلسا خبر گول اوزلولرین هانسین ایستی سن

آغلار گؤزیله من دییه جم اؤز نیگاریمی

ölsm sənin qapında qazarlar məzarımı

ey sübh açıl dübarə görüm nazlı yarımı
həz eylirm görəndə mən ol ba vıqarımı
bilməm ki qara gözləri nin var nə hikməti
əldən alır təvanımı , səbr o qərarımı
düzdüm se layə təxtəyə rəng o qələmləri
tərsim edm ürək də ki nəqş və nigarımı
əvvəl qara gözün gətirm tablu ostünə
zülfün çəkəndə yada salam ruzgarımı
ahu baxışlı gözlərinin haltın çəkəm
bir yol tökəm büm üstünə dar o nədarımı
tərrah lığında hər nə gücüm var nişan verəm
məbhüt edəm işimdə mən öz osta karımı
manı dürüb əlimdən öpüb afərın diyə
surət çəkənlər eylə yə təhsin çıxarımı
könlüm sevir ki mənbəi ilhamım olan mənə
səndən tıvan alıb yaradam şahkarımı
gər ölkəmizdə bilsələ mən aşiqm sənə
ölsəm , sənin qapında qazarlar məzarımı
cənnətdə xalıqım desə bu hürilər bu sən
görsəm quyublar öz əlimə ixtiyarımı
alsa xəbr gül ozlulərın hansın ıstısən
ağlar gözilə mən diyəcəm öz nigarımı
Huşəng Cəfəri Zənganlı