سن گٶزللر گٶزلیندن ده گٶزل سن گٶزلیم

بو گٶزللیکده آغیزلاردا مثل سن گٶزلیم

بو آجی دونیادا سن تکجه شیرین بیر مزه سن

قوی کی من ساده دئییم دادلی عسل سن گٶزلیم

من گٶزل شعرلریمی تکجه سنین عشقه دئدیم

چون کی سن لایق بو شعر و غزل سن گٶزلیم

بیرغم ده اوره ک داغلامیشیق لاله ده من ده

بیرغنچه ده قان آغلامیشیق ژاله ده من ده

گوم گوی گوگریب زانباقین آرخ اوسته جمالی

زانباق دا یانیر عشق اودونا لاله ده من ده

ساپ ساری سارالمیش اوزوم آلاله مثالی

بیر دلبره مفتون اولوب آلاله ده من ده

قیپ قیرمزی گول تک قیزاریر اوزده یاناق لار

حسرت له باخیر گول اوزه محتاله ده من ده

گلشن ده چمن یام یاشیل افغانیده بولبول

بولبول ده گلیب تنگه داخی ناله ده من ده

آغ آپپاق آی اوسته توکولوب قاپ قارا زولفون

حیرت له باخیر آی اوزوده هاله ده من ده

من "یوسف" عشقم یانیرام عشقین اودوندا

نورس ده یانیر عشقیده، ده صد ساله ده، من ده

اولسایدی میسّر، گـؤزه لیـم، یـاریـن اولاردیـم

هر لحظه غمین چکمگه غمخوارین اولاردیم

هر شب دولاشیب صبحه کیمی شمع ِ جمالین

پـروانـه کیمـی، طـالـبِ دیـداریــن اولاردیــم

ممکن کی دئییل بیرده گـزیـم گلشـن ِ کـویـون

ممکـن گـر اولایـدی، یئنـه زوّاریـن اولاردیـم

ای طوطی وشیم، آیئنـهٔ حُسنـونـو گـؤرجـک

آلــودهٔ اول لعــل ِ شکــر بــاریــن اولاردیــم

مجنون کیمی دایم، سـر کـویـونـدا گـزه ردیـم

عؤمـروم نقـدر وارسـا، پـرستـاریـن اولاردیـم

یوسیف کیمی وئرسه یـدیلـه دینـدارینـا قیمـت

جان نقدی ایلـه مـن ده خـریـداریـن اولاردیـم

واحد، سر ِ کویوندا گزه ردیم گئجـه ـ گـونـدوز

ای مـه، بـو ادا ایلـه دل افکــاریــن اولاردیــم

علی آقا واحد