دئدیم ای دلبر آییر زلفو اوزون ده
هایاباخ!
آییریب سؤیله دی شاهی هایا باخما آیا باخ!
گونده مین سینه سوکور قاشلاری مژگانی تیکیر
چیخ تماشایه کؤنول گاه اوخا باخ گاه یایا باخ !
کامینه چاتدی باهار ، بوزلاری آغلاتدی باهار
دور گل ای آهو باخیش چشمه نی سئر ائت چایا باخ !
پای چاتیب پارچا اوره کلن منه سؤز سلطنتی
سؤیله شاهنشهه گل پارچانی درک ائت پایاباخ !
نفسیم گرچی قیریلمیش قوجالیقدان ولی سن
بیر نظر قیل سوموگومدن اوجالان نای نایا باخ !
جنتی وعده وئریرلر ساچووی ترک ائله سم
کهنه لن قصه نی گؤر وقتی کئچن لای لایا باخ!
نه گؤزل سئومه لی وقتیدی او وقتی کی تولین
آییریب سؤیله دی "شاهی "هایا باخما آیا باخ!
استاد عسگر شاهی
+0 به یه ن
خم ده سیندی سبوده جاملاردا
پخته لرده كول اولدو خاملاردا
یوخ گولوش بیر دوداقدا بیر گؤزده
پسته لر زهر اولوب باداملاردا
خیره لر خبره لر یئرین دوتموش
ذوقدن دم وورور زكاملاردا
بس كی قلّابی دیر صداقت لر
قلبی لیللندیریر سلاملاردا
اول قده ر خلقی توولاییب دونیا
دین ده یاد دان چیخیب اماملاردا
تكجه علم اهلی خلقه تیكمز بؤرك
شیطانا دؤن بیچر عواملاردا
كافری بیر كاسا سو پاك ائتدی
بیزی پاك ائلیه مز حاماملاردا
رستمینده قلینجی پاسلاندی
باتدی قانلاركیمی قیاملاردا
شعرده یونگول اولدو شاهی ده
ایتدی عزّت ده احتراملاردا
استاد شاهی
– 1355خزل آیی
+0 به یه ن
كیپریك لریوه جانیمی قربان دئمیشم من
قان- قان بویوران اوخلارا جان- جان دئمیشم من
عشق آتشی دیر قلبی ائدن قبله ی عالم
اود سوز اوره گه سنگ بیابان دئمیشم من
ترك ائت دئدیم ای دیل او قرا زلفو بویوردو
هر رشته سینه رشته ی ایمان دئمیشم من
هر كیمسه یه كیم خال و خطین سّرینی بیلمز
علامه ی دهر اولسادا نادان دئمیشم من
دلدار سؤزوندن سوراكی سؤزلره شاهدی
هر سؤز دئمیشم دهر ده هذیان دئمیشم من
جان كعبه سی دیر صورتون اول كعبه ی جاندان
اُوز دؤنده ره ن انسانلارا شیطان دئمیشم من
اوستاده دئدیم درگه معشوقده " شاهی "
سائلدی ، دئدی سائله سلطان دئمیشم من
+0 به یه ن
بیر بئله كی تئل لرون محرم اولوب یئل لره
بیلمه ییرم یالواریم یئل لره یا تئل لره
چوخ اوزادیب هجرانی تؤكمه گؤزومدن قانی
یوخسابوتون دونیانی غرق ائدرم سئل لره
پرده نی رد ّ ائت بوگون قاشلارووا وور دوگون
تاداخی لشكر قلیج باغلاماسون بئل لره
قلبیم اولوب یوز پارا ، هر یوزی قربان یارا
وئرمه اونو شاهلارا ، قوشما منی وئل لره
سؤیله دیم ای گلعذار ، گل بو جانی آل قوتار
سؤیله دی شاهی آپار ، قربان ائله ائل لره
+0 به یه ن
نگار اگر نگاردور ، خزاندا بیر
بهاردور
خزاندا بیر بهاردور ، نگار اگر نگاردور
حساب عقلی وور داشا ، جناب
عشق ایلن یاشا
اسیر اولا قلم قاشا ، اوكس كی بختیاردور
اوره ك قانین شراب ائله ، اوزوم سویون داغیت چؤله
قسم صبا سئون تئله ، او نور دور بو نار دور
قفسدی خلقه ممكنات ، قفسده خوش دگیل حیات
حیاتی آت وجودو سات ، او ننگدور بو عار
دور
گزه ن اوره ك مدینه سین ، تاپار صمد خزینه سین
اؤپر فرشته سینه سین ، دییر بو بیت یار دور
شاه اولدوزا كمند آتیب ،
ساچیلا "شاهی" جان قاتیب
او یئل لره دچاردور ، بو تئل لره دچاردور
+0 به یه ن