بیلمم نیه هر یاندا بلا پس بیزی توتدی

هر بیر یانار اوت دوشدی گولستانی قوروتدی

بیلمم نیه نعمت بولاغین قاینادان الله

یوسقوللاری بس بیر بیله نعمت دن اونوتدی

بیلمم نیچون یوسوفه حُسنی ورن الله

عشق آتشینه قلب ذولیخانی چوروتدی

دوستلار نه خطا ایلدی دوستلوخدان علاوه

دوست اوستونه دوشمنلری دائم یوگوروتدی

دولتلیه رضواندی جهان یوخسولا زندان

ایپ سالدی بو یوخسوللاری زندانه سوروتدی

صابر اشیدیپ بو سوزی باخدی منه گولدی

عرض اتدی بالا بیزلری بیگانه چوروتدی

احساسیله اویناتدی بیزی عقلیمیز آزدی

ئوزباشینا بو میللتین ئوز داشینی سورتدی

پابند اولوپ بس کی خرافاته مسلمان

غفلتده گالیپ چشمه ی تقوانی چوروتدی

بیگانه چالیپ لای لایه خلق یوخلادی یاتدی

ئوز بارماقینی میللتین ئوز گوزونه دورتدی

هرعاشق اولان عشقه گرفتار اولابیلمز

هرخورما ساتان میثم تمار اولابیلمز

مخلوق خداوند اوزونه اولمیان عاشیق

حق عاشقه تک صاحب ایثار اولابیلمز

دونیا مالونا شهرتینه وورقون اولانلار

انفاق ایله مز طالب دیدار اولابیلمز

ماموره اگر رشوه یماخ اولماسا عادات

مظلوملارین قاننه ظالم سورا بیلمز

میمون تکین هر سوزه تقلید ایلینلر

اندیشه ادیب صاحب افکار اولابیلمز

«صابر» یمه غم هر گونین ئوز قصه سه واردور

مفرق پاراسه گوهر شهـوار اولابیلمز

گول منی سن ایسته سن عومروم هدر اولماز

صلح اولماسا، اولاد وطن بخته ور اولماز

آزاده لیقی، صولحی سئویلر بیزیم ائللر

بیر یئرده کی، صولح اولسا، او یئرده ضرر اولماز

اودلار وطنین نازلی گوزه للر بورویوبدور

ائللرده مثل وارکی، گوزل سیز شهر اولماز

آهیم اودو بلکه ائله سین قلبینه تاثیر

نیسان سویونو ایچمه یه داشدان گهر اولماز

هیجران گئجه سی، من چکنی چکمه سین اغیار

ظننیم جه قیامت گونو بوندان بتر اولماز

زولفون اوزونو توتسادا، گویچک لیگین آرتیر

ظلمت گئجه لر اولماسا آیدین سحر اولماز

واحد سنه، غم چکمه رقابت ائدن اولسا

مین گول قووشا بیر یئره، بحر خزر اولماز

ای حسینه آغلیانلار ، آغلیون اوز حالیزا

ایندی آغلیر كربلا شاهی سیزین احوالیزا

راد مردان خدا اؤلمز همیشه زنده دیر

سیز اؤلورسوز باخمایین بو جارو بو جنجالیزا

امت بی غئیرتی نئیلر امام تشنه لب؟

احتیاجی یوخ سیزین بیر قطره اشك آلیزا

آغلاماق وئرمز نتیجه ، عزت دین اولماسا

یا گولون  یا آغلایین  یا   كول یاخین ساققالیزا

شیمردن آرتیق حسینه سیز اذیت ائیله دیز

ای خلاف شرع ائدنلر! بیر باخین اعمالیزا

شیمر بیر دفعه حسینی اؤلدوروب ، مین دفعه سیز

اؤلدوره رسیز گر دوشه ایندی سیزین چنگالیزا

سؤزلریز غیبتدی ، بؤهتاندی، یالاندی ایفتیرا

نه وئره ر  آللاه سیزین بو خشگه قیل و قالیزا

بیر بئله داد و فغان  ائتدیز حسینه آغلادیز

ای منافیق لر! نه آلدیز باغلادیز دسمالیزا؟!

نور چشم مصطفی، محبوب رب العالمین

دوز مسلمانی سئور آند اولسون استقلالیزا

خامس آل عبانی  بیلمه دیز مقصودینی

ایسته دی رونق وئره سیزین اجلالیزا

شرقدن غربه گره ك سیز اولایدیز حكمران

لیك سیز آماده سیز ایندی اؤز اضمحلالیزا

پاكدل انسان سیزی گؤرسه یقین  گمراه اولار

كیم سیزی ناپاك ائدیب لعنت گله غسالیزا

خلقی شئیطان توولایاندا ،  توولویورسوز شئیطانی سیز

مات و حئیران قالمیشام بو شیوه اغفالیزا

یا گلین بو درگه سلطانه  سیز اصلاح اولون

یا گئدین تابع اولون بیر دفعه اؤز دجالیزا!

 اهل قرآن سیز اگر، قرآنیله  رفتار ائدین

ناطق قرآن سیزین باخسین گؤزل اعمالیزا

زیر بار ظلمه او عالمده بیر آن گئتمه دی

سیز ولی بیر عؤمر آلدیز  بار ذلت دالیزا

لعنت پروردگار اولسون گؤروم صبح و مسا

پیی پارافیندن قاییرما یاغ ساتان باققالیزا

واردی بیر عده حسینچی  پاكدامن  بی ریا

نه سیزه بنزه ر اولار، نه سیزین امثالیزا

من سیزه آللاهدان  هر وقت توفیق ایسته رم

سیز ده توفیق ایسته یین « حـداد » تك نقالیزا