گول منی سن ایسته سن عومروم هدر اولماز

صلح اولماسا، اولاد وطن بخته ور اولماز

آزاده لیقی، صولحی سئویلر بیزیم ائللر

بیر یئرده کی، صولح اولسا، او یئرده ضرر اولماز

اودلار وطنین نازلی گوزه للر بورویوبدور

ائللرده مثل وارکی، گوزل سیز شهر اولماز

آهیم اودو بلکه ائله سین قلبینه تاثیر

نیسان سویونو ایچمه یه داشدان گهر اولماز

هیجران گئجه سی، من چکنی چکمه سین اغیار

ظننیم جه قیامت گونو بوندان بتر اولماز

زولفون اوزونو توتسادا، گویچک لیگین آرتیر

ظلمت گئجه لر اولماسا آیدین سحر اولماز

واحد سنه، غم چکمه رقابت ائدن اولسا

مین گول قووشا بیر یئره، بحر خزر اولماز

آی اوزلو نگاریم کیمه مهمان اولاجاقسان

بیر سؤیله کیمین شانینه شایان اولاجاقسان

شاهلیق چتری وار باشین اوستونده بو آخشام

عنبر چترینله کیمه سلطان اولاجاقسان

شکر دئمیرم من سنه اوندان دا شیرین سن

دلبر نئجه بیر بختوره جان اولاجاقسان

ظلمت گئجه سن نورلی چیراغ ، پیس گوزه گلمه

ای آب حیات سن کیمه جانان اولاجاقسان

گئتدین نئجه بس تاب ائله سین هجره نظامی

او خسته ایکن، سن کیمه درمان اولاجاقسان

بیر زمان منده اسیر ره میخانه ایدیم

هوس باده ایله عاشق پیمانه ایدیم

بیر دقیقه یئره دوشمزدی ایمدن باده

گوزلرین شوقی ایله ائیله کی مستانه ایدیم

بوتون عؤمروم گئچیب عالمده شراب ایچمه گیله

باده دن خالی اؤلان یئرلره بیگانه ایدیم

ایندی تکلیف شراب ائله مک آرتیقدی منه

منکه میخانه ده بیر خانه سی ویرانه ایدیم

شمعه پروانه یانیردی گئجه لر صبحه کیمی

منده اؤز سئوگیلی مین شمعینه پروانه ایدیم

چالیشردیم ساچینین فکری باشیمدان چیخسون

گؤزمه سیدیم سنی بیر گون دلی دیوانه ایدیم

منی واحد بو پری چهره لر ائتمیشدی اسیر

منده مجنون کیمی دیل لرده بیر افسانه ایدیم

دیدیم: ای غنچه دهن، کونلومی قان ائیله‌میسن!

 دیدی: «بی‌جا یئره عشقمده فغان ائیله‌میسن»!

دیدیم: انصاف ائیله اینجیتمه منی عاشقینم...

 دیدی: «گئت!،سرّیمی دنیایه عیان ائیله‌میسن»

دیدیم: آغلاتما منی سرو بویون شوقینده!

 دیدی: «گوز یاشینی بیهوده روان ائیله‌میسن»

دیدیم: آخر گوزلیم، باغ و بهاریم سنسن

دیدی: «سن عمرینی حسرتله خزان ائیله‌میسن»

دیدیم: آز چکمه‌میشم گوزلرینین حسرتینی

دیدی: «اؤز کونلونی یئر سیز نگران ائیله‌میسن»

دیدیم: عشقینده اسیرم، منه بس خیری نه‌دی؟

دیدی: «اولده بو سوداده زیان ائیله‌میسن»

دیدیم: عشق آتشی نیلر منه؟ قورخان ده‌گیلم

دیدی: «بیچاره یانارسان! نه گومان ائیله میسن»؟

دیدیم: ای گل! من ازلدن‌ده گوزه‌ل عاشقیم

دیدی: «سن روحینی عشق‌ائیله جوان ائیله‌میسن»

دیدیم: هر گون سر کوی‌ینده دولانماقدر ایشیم

دیدی: «واحد، نه گوزه‌ل یئرده مکان ائیله‌میسن»

علی آقا واحد

سن نئجه یار سن هئچ اغیاریله فرقین یوخوموش

سن نئجه گون سن هئچ شمعیله فرقین یوخوموش

نقدر نازووه من برده کیمین هی سورونوم

بلکه من بیلممیشم سنده لطافت یوخوموش

هی دالونجا بو کوچه ،پس کوچه دن یوللانیرام

بئله فیکر ایلیرم یوللارا مقصد یوخوموش

یا کی مقصد وارو سن آیری خیال ایلمیسن

ائله فیکر ایلیسن منده تفکر یوخوموش

هر نه فیکر ایلیسن فیکروه ثابت قدم اول

قوی دئسونلر فخریده بو امره تمنا یوخوموش

ساییرام قاپلاری بیر بیر کی چاتام مقصدیمه

اما بیله آگاه اولورام یاریمه منزل یوخوموش

تیکجم عشق ومحبتدن اول یاریمه بیر منزل

کی گوروب بیلسین اونون اوستونه بیرکاخ یوخوموش

فخریا، عشقسیز هر کس کی بو دنیاده یاشیر

بونی بیل اوندا بو دنیایه لیاقت یوخوموش

فخرالدین محمدی